کوئٹہ: وزیراعلیٰ بلوچستان عبدالقدوس بزنجو کے خلاف تحریک عدم اعتماد جمع کرا دی گئی ہے جس کے بعد بلوچستان میں ایک بار پھر حکومت کی تبدیلی کا امکان پیدا ہوا ہے۔ 

وزیراعلیٰ بلوچستان عبدالقدوس بزنجو کے خلاف جمع کرائی جانے والی تحریک عدم اعتماد پر 14 اراکین اسمبلی کے دستخط موجود ہیں۔

پاکستان تحریک انصاف کے رہنما یار محمد رند نے وزیراعلیٰ بلوچستان عبدالقدوس بزنجو کے خلاف تحریک عدم اعتماد لانے کا اعلان کیا تھا۔

میڈیاسے بات چیت کرتے ہوئے یار محمد رند نے کہا تھا کہ وزیراعلیٰ بلوچستان کے خلاف تحریک عدم اعتماد کیلئے ہمارے پاس نمبرز پور ے ہیں۔

پی ٹی آئی رہنما یار محمد رند نے ایک سوال کے جواب میں کہا تھا کہ تمام جماعتوں سے مشاورت کر کے نئے وزیراعلیٰ کو نامزد کریں گے۔

ذرائع کے مطابق عبدالقدوس بزنجو کے خلاف جمع کرائی جانے والی تحریک عدم اعتماد پر کچھ حکومتی اراکین اور وزرا کے بھی دستخط موجود ہیں۔

واضح رہے کہ کچھ ہی عرصہ قبل سابق وزیراعلیٰ بلوچستان جام کمال خان کے خلاف تحریک عدم پیش کی گئی تھی۔ اس وقت کے وزیراعلیٰ جام کمال خان نے اس کے بعد استعفیٰ دے دیا تھا اور ایوان نے عبدالقدوس بزنجو کو نیا وزیر اعلیٰ منتخب کرلیا تھا۔