شاداب خان انجری کا شکار ہوکر دورہ جنوبی افریقہ اور زمبابوے سے باہر

قومی کرکٹ ٹیم کے آل راؤنڈر شاداب خان بائیں پاؤں میں انجری کے باعث دورہ جنوبی افریقہ کے باقی میچز اور دورہ زمبابوے سے باہر ہوگئے۔

پاکستان کرکٹ بورڈ (پی سی بی) سے جاری بیان کے مطابق شاداب خان جوہانسبرگ میں کھیلے گئے جنوبی افریقہ کے خلاف دوسرے ایک روزہ میچ میں بیٹنگ کے دوران بائیں بازو پر گیند لگنے کے باعث انجری کا شکار ہوئے تھے۔

انجری کا شکار ہونے پر شاداب خان کا ایکسرے کروایا گیا جس میں انٹرا آرٹیکلور کیمونیکیٹڈ فریکچر کی تشخیص ہوئی۔

بیان میں کہا گیا کہ آل راؤنڈر کو چار ہفتوں کے لیے ری ہیب تجویز کیا گیا ہے، جس کے باعث وہ اس عرصے کے لیے کرکٹ سے دور ہوگئے ہیں۔

واضح رہے کہ پاکستان اور جنوبی افریقہ کے درمیان تین ایک روزہ میچز کی سیریز 1-1 سے برابر ہے۔

گزشتہ روز کھیلے گئے دوسرے ایک روزہ میچ میں فخر زمان کی 193 رنز کی شاندار اننگز کے باوجود جنوبی افریقہ نے پاکستان کو دلچسپ مقابلے کے بعد 17 رنز سے شکست دے دی تھی۔

قبل ازیں سیریز کے پہلے ون ڈے میچ میں پاکستان نے میزبان ٹیم کو سنسنی خیز مقابلے کے بعد 3 وکٹوں سےشکست دی تھی۔

یہ بھی پڑھیں

فخر زمان کے رن آؤٹ پر جاوید میانداد نے زبردست جواب دیا: وسیم اکرم

سابق کپتان پاکستان کرکٹ ٹیم اور سوئنگ کے سلطان وسیم اکرم نے فخر زمان کی …